Гродзенская пракуратура сёлета накіравала ў суды 75 заяў аб прызнанні інтэрнэт-рэсурсаў «экстрэмісцкімі»

З улікам таго, што ў заявах пракурора горада часам былі згаданыя не адзін, а некалькі рэсурсаў, іх колькасць сягае за сотню. Абсалютную большасць гэтых заяў разглядаў суд Ленінскага раёна Гродна.

Выява зроблена БАЖ пры дапамозе Chat­G­PT

Так, сёлета ў красавіку гэты суд прызнаў «экстрэмісцкай інфармацыйнай прадукцыяй» акаўнты Bel­sat in Eng­lish у сацсетках Х і Face­book, а таксама акаўнты «БелНовости» ў Telegram і Insta­gram, прычым разам з лагатыпам.

У ліпені суд Ленінскага раёна Гродна пастанавіў лічыць «экстрэмісцкім» кантэнт акаўнта ў Х выдання Hrodna.life, у жніўні — навінавую старонку ў Insta­gram з назвай look.at.grodno, сайт польскага часопіса Gosc Niedziel­ny разам з сацсеткамі і лагатыпам, у верасні — Telegram-акаўнты «Салідарнасць – сувязь з рэдакцыяй» і «Реклама NEXTA 2», Telegram-боты «Редакция NEXTA» і «Рэдакция Медиазоны Беларусь».

У верасні паводле заяў з гарадской пракуратуры Гродна «экстрэмісцкай інфармацыйнай прадукцыяй» былі прызнаны праваабарончы Telegram-акаўнт MAYDAY MOGILEV, Telegram-боты «Реклама Tribuna.com» і «Редакция “БГ”».

Як паведамляе служба інфармацыі пракуратуры Гродзенскай вобласці, за дзесяць месяцаў 2026 года суд Ленінскага раёна горада Гродна прызнаў «экстрэмісцкімі» матэрыяламі інфармацыйную прадукцыю, размешчаную:

• у 65 Telegram-чатах, ботах і каналах;
• у 26 акаўнтах ці супольнасцях у сацыяльнай сетцы Face­book;
• на 7 старонках у сацыяльнай сетцы Insta­gram;
• на 7 каналах на відэахостынгу YouTube;
• у 4 акаўнтах у сацыяльнай сетцы Tik­Tok;
• у 3 акаўнтах у сацыяльных сетках «ВКонтакте», «Х», Threads і інш.;
• на 3 інтэрнэт-сайтах.

Пераважна гэта навінавыя інтэрнэт-рэсурсы, старонкі ў сацсетках, якія належаць журналістам, праваабаронцам, апазіцыйным актывістам або структурам.

У адпаведнасці з судовымі рашэннямі гэтыя інтэрнэт-рэсурсы ўключаныя ў Рэспубліканскі спіс экстрэмісцкіх матэрыялаў, і за любое ўзаемадзеянне з імі (уключаючы захаванне спасылак) чытачам і гледачам пагражае адміністрацыйная адказнасць.