Журналістцы «Белсата» Кацярыне Андрэевай прад’явілі абвінавачванне ў здрадзе дзяржаве

«Мы не ведаем, на аснове якіх падзеяў узнікла гэтае абвінавачванне. Справай займалася УКДБ па Гомельскай вобласці, следства праходзіла ва ўмовах поўнай сакрэтнасці — г.зн. аж да ўчорашняга дня, на працягу 55 сутак пасля яе пераводу ў СІЗА, сваякі не ведалі ні статус Каці, ні артыкулы па якім праводзяцца тыя самыя «працэсуальныя дзеянні». Пра сутнасць абвінавачання мы нічога не ведаем да гэтага часу і напэўна ніякай інфармацыі на гэты конт ужо не атрымаем — суд відавочна будзе закрытым», — напісаў Ігар Ільяш.

Кацярыне пагражае ад 7 да 15 гадоў пазбаўлення волі. Следства завершана, справа будзе перададзена ў пракуратуру. Магчыма, ужо ў маі адбудзецца судовы працэс.

Кацярына Андрэева ​​была затрымана разам з Дар’яй Чульцовай 15 лістапада падчас асвятлення пратэстнай акцыі ў Мінску. Яе абвінавацілі  паводле арт. 342 КК ( «Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх»).

Спачатку іх асудзілі на 7 сутак за «ўдзел у несанкцыянаванай акцыі і непадпарадкаванне». Потым абвінавацілі ў арганізацыі і падрыхтоўцы дзеянняў, якія груба парушаюць грамадскі парадак. 18 лютага 2021 года ім прысудзілі па 2 гады пазбаўлення волі ў калоніі агульнага рэжыму.

Праваабаронцы прызналі журналістак палітвязнямі.

„Мая задача — захаваць душу ад распаду і не дазволіць зоне пракрасціся ў мяне. Не стаць часткай выродлівага [турэмнага свету], а зрабіць трохі больш цудоўнай прасторы вакол сябе“, — сказала сказала Кацярына Андрэева падчас спаткання з мужам у гомельскай калоніі.