У Варшаве пройдзе ўзнагароджанне пераможцаў Беларускай прэміі кінакрытыкаў «Чырвоны верас’26»

28 лютага ў «Kino Luna» ў Варшаве пройдзе цырымонія ўзнагароджання трэцяй эдыцыі Беларускай прэміі кінакрытыкаў «Чырвоны верас». Падчас імпрэзы стануць вядомыя пераможцы ў 15 намінацыях. Іх вызначыла журы з 20 кінакрытыкаў, кінажурналістаў і кінадаследнікаў.

Усяго ў разглядзе бралі ўдзел 60 стужак — гэта поўна- і кароткаметражныя ігравыя, дакументальныя і анімацыйныя стужкі, створаныя беларусамі.  Упершыню асобна разглядаюцца дакументальныя рэпартажы.

Дзве з намінацыяў — акурат «Найлепшы дакументальны рэпартаж» і «Найлепшы мантаж» — з’явіліся ў гэтым сезоне кінапрэміі ўпершыню. 

Вядучымі цырымоніі будуць акторка і аўдыявыдаўца Крысціна Дробыш, а таксама актор ды музыка Павел Гарадніцкі.

З кароткім спісам намінантаў можна азнаёміцца тут.

Беларуская прэмія кінакрытыкаў арганізуецца пры падтрыманні фонду «Trzy Trą­by» і Нямецкага фонду Маршала.