«Спроба абмежаваць доступ да надзейнай і незалежнай інфармацыі». Польскае інфармагенцтва адрэагавала на абвінавачванні ў «экстрэмізме»
30 ліпеня 2026
Польскае агенцтва прэсы PAP падкрэсліла, што будзе працягваць асвятляць падзеі ў Беларусі ў адпаведнасці са стандартамі прафесійнай журналістыкі.
Фота: PAP
Польскае інфармацыйнае агенцтва PAP распаўсюдзіла заяву з нагоды ўключэння ўладамі Беларусі інтэрнэт-парталу медыя ў Рэспубліканскі спіс экстрэмісцкіх матэрыялаў.
«Мы разглядаем рашэнне беларускага суда як спробу абмежаваць доступ да надзейнай і незалежнай інфармацыі», — заявіў генеральны дырэктар PAP Марэк Блоньскі.
«Польскае прэс-агенцтва будзе працягваць асвятляць падзеі ў Беларусі ў адпаведнасці са стандартамі прафесійнай журналістыкі. Гэтае рашэнне не зменіць нашых прынцыпаў або практыкі працы. Адначасова мы з асаблівай адказнасцю ставімся да бяспекі нашых крыніц і атрымальнікаў інфармацыі ў Беларусі», — дадаў ён.
У спіс «экстрэмісцкіх матэрыялаў» сайт PAP трапіў па рашэнні суда Горацкага раёна Магілёўскай вобласці ад 28 ліпеня 2026 года.
Раней у гэты спіс беларускія ўлады ўключалі сайт медыякарпарацыі BBC, YouTube-канал буйнога літоўскага партала Delfi, інтэрнэт-рэсурсы украінскіх медыя.
Польскае агенцтва прэсы (PAP) — найбуйнейшае інфармацыйнае агенцтва ў Польшчы, працуе больш за 100 гадоў. Як грамадскае прэс-агенцтва, PAP адказвае між іншым за распаўсюджванне пазіцый Сейма, Сената, Прэзідэнта Рэспублікі Польшча і Савета Міністраў, а таксама за тое, каб іншыя дзяржаўныя органы маглі прадстаўляць свае пазіцыі па ключавых пытаннях.
@bajmedia
