У «экстрэмісцкі» спіс Мінінфарма ўнеслі TikTok-акаўнт Daily World News і другі раз — акаўнт у Facebook Міколы Дзядка

Міністэрства інфармацыі Беларусі 21 верасня чарговы раз папоўніла на сваім сайце Рэспубліканскі спіс экстрэмісцкіх матэрыялаў.

Фота: Jan van der Wolf для pexels.com

Face­book-акаўнт Miko­la Dzi­adok (ідэнтыфікатар https://www.facebook.com/happymikola), дададзены ў гэты спіс, належыць блогеру і журналісту, былому палітвязню Міколу Дзядку. Пасля вызвалення з‑за кратаў у верасні 2025 года Дзядок быў прымусова вывезены за межы Беларусі. Цяпер ён жыве ў Вільні, працягвае весці блог і сацсеткі, піша на грамадска-палітычную тэматыку.

Акаўнт Міколы Дзядка ў Face­book прызнавалі «экстрэмісцкай інфармацыйнай прадукцыяй» двойчы. Першы раз — у траўні 2025 года, тады змест рэсурсу палічыў «экстрэмісцкім» суд Цэнтральнага раёна Мінска. Другі раз такое самае рашэнне прыняў 18 верасня 2026 года суд Клічаўскага раёна Магілёўскай вобласці.

У Рэспубліканскі спіс экстрэмісцкіх матэрыялаў унеслі і Tik­Tok-акаўнт Dai­ly World News (ідэнтыфікатар https://www.tiktok.com/@daily_world_news56). «Экстрэмісцкай інфармацыйнай прадукцыяй» 17 верасня 2026 года яго прызнаў той самы суд Клічаўскага раёна Магілёўскай вобласці.

Tik­Tok-акаўнт Dai­ly World News размяшчае кароткія навінавыя зводкі ў відэафармаце пра падзеі з усяго свету. Старонка мае 14 800 падпісчыкаў.