У Беластоку праходзіць серыя квізаў да 30-годдзя БАЖ

Сёння ў Беластоку пройдзе трэці квіз, прысвечаны 30-годдзю заснавання БАЖ. Папярэднія два квізы таксама ладзіліся ў траўні. Неўзабаве пасля Беластока медыяквіз прыедзе ў Вільню. Сачыце за нашымі абвесткамі!

Аляксей Шота. Фота: з асабістага архіва

Аўтар квіза і галоўны рэдактар выдання Hrodna.life Аляксей Шота даўно вядомы не толькі як вялікі аматар квізаў, але і аўтар:

— Я праводжу агульнатэматычныя квізы ў Беластоку з лютага 2023 года — ужо больш за два гады. Квізы ў Беластоку вельмі папулярная забава не толькі сярод беларусаў, але і сярод рускамоўнага насельніцтва.

Акрамя таго журналісту даводзілася пісаць таксама аўтарскія тэматычныя квізы:

— Напрыклад, наш беластоцкі бегавы клуб TEA.M RUN прасіў мяне падрыхтаваць аўтарскі квіз на ягоны дзень нараджэння. А для гарадзенцаў вельмі важная дата — Дзень святога Губерта, на які гарадзенскія мігранты сустракаліся разам, і я рабіў квіз на гарадзенскую тэматыку.

Як правіла, пытанні складаюць людзі і дасылаюць іх арганізатарам, а сам Аляксей Шота выступае ўжо ў якасці вядоўцы імпрэзы.

— Калегі з Беларускай асацыяцыі журналістаў даведаліся пра мой досвед і прапанавалі далучыцца да медыяхвалі юбілейных імпрэз, датычных 30-годдзя БАЖ. Чаму б і не правесці квізы на тэму журналістыкі, здольныя аб’яднаць і рэпарцёраў, і аўдыторыю (чытачоў, слухачоў, гледачоў)? Заадно павялічыць бачнасць беларускіх медыяў і ўзняць тэмы медыяпісьменнасці, узняць праблемы фэйкаў, прапаганды. І зрабіць усё ў прывабнай і свабоднай форме, — кажа рэдактар Hrodna.life.

У Беластоку ў траўні ўжо прайшлі два квізы, у якіх прынялі ўдзел восем каманд.

— Гэта многа, праўду, многа. Прыходзяць і журналісты, якія жывуць у Беластоку, і проста аматары квізаў, якія ніколі не працавалі ў медыясферы. Здаецца, эксперымент прайшоў даволі паспяхова, хаця да апошняга захоўвалася інтрыга: пойдуць людзі на вузкатэматычны квіз ці не пойдуць?

Магчыма, правільнай аказалася тактыка, якую прымяняе Аляксей Шота:

— Я стараюся рабіць квізы не столькі на праверку ведаў, колькі на роздумы і ўменне думаць: многія пытанні разлічаны на логіку, многія можна дакруціць. Але, канешне, былі заданні і на веды: кшталту, трэба было ўгадаць медыя па лагатыпу, знайсці адказ, звязаны з канкрэтнымі медыямі і загалоўкамі. Пытанні-«знайкі», дапускаю, лягчэйшыя, чым пытанні на логіку і многакрокавыя развагі.

У 2025‑м годзе Беларуская асацыяцыя журналістаў адзначае сваё 30-годдзе. На жаль, нягледзячы на святочныя падзеі, амаль 40 нашых калег сёння застаюцца за кратамі ў Беларусі. Каб разам адзначыць юбілей БАЖ, а таксама выказаць салідарнасць з калегамі за кратамі, Асацыяцыя арганізавала шэраг мерапрыемстваў. Напрыклад, 14 чэрвеня журналісты праедуць велапрабегам з партрэтамі сваіх калег.