Праз месяц (ВІДЭА, фрагмент праграмы «Маю права» тэлеканалу «Белсат»)

­Прайшоў месяц пасля таго, як супрацоўнікі КДБ правялі па ўсёй краіне ператрусы ў кватэрах журналістаў. Месяца хапіла на тое, каб жарсці ўлягліся і грукат ў дзверы чакаўся ўжо не так напружана. І каб пракуратура адказала на запыты БАЖ. 

З гэтага адказу вынікае, па-першае, што пракуратура адмежавалася ад каментара намесніцы кіраўніка ўпраўлення інфармацыі МЗС Марыі Ваньшынай, якая наўпрост звязала ператрусы з тым, што «пацярпелыя» журналісты супрацоўнічалі з замежнымі СМІ без акрэдытацыі. (І гэта зразумела: пракуратура добра разумее, что адсутнасць акрэдытацыі, нават калі і так, не ёсць падставай для ранішніх візітаў контрвыведкі і ператрусаў). 

Па-другое — што следчыя зараз вывучаюць змесціва кампутараў і дакументаў, забраных падчас ператрусаў. 

І трэцяе — што вяртання ўласнай маёмасці журналістам чакаць у хуткім часе не даводзіцца. Што было зразумела ад самага пачатку.

А яшчэ за гэты месяц паспела выйсці праграма «Маю права», у якой і разглядалася «бліскучая» аперацыя беларускіх спецслужбаў па ўскрыцці… журналісцкай сеткі.

Глядзіце, чытайце. Сустрэнемся праз…