Фінляндыя застанецца без свайго нацыянальнага інфармацыйнага агенцтва — пасля 140 гадоў працы STT спыняе працу

Фінскае інфармацыйнае агенцтва STT з сакавіка 2027 года закрывае навінавы і фотажурналісцкі аддзелы. Рада дырэктараў скарачае 89 працоўных месцаў у адным з найстарэйшых дзейных інфармацыйных агенцтваў свету.

Офіс STT. Фота: Antti Aimo-Koivis­to / Lehtiku­va

У мінулым месяцы STT паведаміла пра планы рады дырэктараў спыніць дзейнасць кампаніі пасля амаль 140 гадоў працы. Фінскі саюз журналістаў Jour­nal­is­tili­it­to назваў гэтую навіну «шокам». У прэс-рэлізе агенцтва заявіла, што рэструктурызацыя выкліканая шматгадовымі стратамі і складанымі ўмовамі працы.

Як паведамляе фінскі тэле- і радыёвяшчальнік Yle, шасці з усіх 95 штатных супрацоўнікаў STT прапануюць магчымасць працягнуць працу ў кампаніі на пасадах, не звязаных з журналістыкай.

Канец эпохі

Меркаванае закрыццё навінавага і фотажурналісцкага аддзелаў STT стала вынікам некалькіх гадоў фінансавых цяжкасцяў.

У мінулым годзе найбуйнейшы акцыянер STT, кампанія Sanoma Media Fin­land, абвясціла пра планы істотна скараціць выкарыстанне навінавых і фотапаслуг агенцтва. Гэта прывяло да рэструктурызацыі і выклікала сур’ёзныя сумневы адносна будучыні агенцтва.

Фотааддзел агенцтва STT. Фота: Mikko Kos­ki / Yle

Урад выдзеліў STT каля мільёна еўра дзяржаўнай дапамогі, але агенцтва адмовілася ад гэтых грошай, палічыўшы іх недастатковымі для працягу дзейнасці.

Агенцтва са штаб-кватэрай у Хельсінкі заснаванае ў 1887 годзе. Цягам усёй сваёй гісторыі яго навіны і фота шырока выкарыстоўваліся ўсімі буйнымі фінскімі СМІ.

«Гэта жахлівая навіна, — заявіла Мар’яана Вармавуоры, старшыня Саюза журналістаў Фінляндыі (UJF). — STT — гэта не проста адна з многіх медыякампаній. Яго роля ў стварэнні і распаўсюджванні дакладнай інфармацыі ў Фінляндыі незаменная».

«Удар па інфапрасторы Фінляндыі ў той час, калі надзейныя незалежныя навіны важныя як ніколі»

Еўрапейская федэрацыя журналістаў (EFJ) далучаецца да свайго фінскага філіяла — Саюза журналістаў Фінляндыі (UJF) — і выказвае глыбокую занепакоенасць заявай фінскага нацыянальнага інфармацыйнага агенцтва STT аб магчымым спыненні дзейнасці яго навінавай і фотаслужбаў.

EFJ зазначае, што згодна з даследаваннямі STT з’яўляецца самай надзейнай крыніцай інфармацыі ў Фінляндыі. Агенцтва стварае мноства нацыянальных і міжнародных матэрыялаў, якія пасля выкарыстоўваюць рэгіянальныя СМІ. Знікненне STT прымусіць невялікія СМІ шукаць замену навінавым і фотаслужбам агенцтва, што павялічыць выдаткі на вытворчасць навін па ўсёй краіне.

Як кажа старшыня UJF Мар’яана Вармавуоры, «з улікам цяперашняй сітуацыі ў сферы бяспекі, калі маніпуляванне інфармацыяй стала звычайнай з’явай, Фінляндыя павінна ўмацоўваць інфраструктуру распаўсюджвання інфармацыі, а не аслабляць яе».

Рашэнне аб закрыцці агенцтва стала вынікам шматгадовага пагаршэння фінансавага становішча рэгіянальных і мясцовых СМІ. Раней сёлета Міністэрства транспарту і сувязі паведаміла пра падрыхтоўку пакета эканамічных мер для вырашэння фінансавага крызісу STT, адзначыўшы, што агенцтва не пяройдзе пад кантроль урада прэм’ер-міністра Петэры Орпа. Вармавуоры адзначае, што сродкі, неабходныя для выратавання STT, цалкам рэальна знайсці, «калі на тое будзе палітычная воля».

Генеральны сакратар EFJ Рыкарда Гуцьерэс заявіў:

«Магчымае закрыццё STT стане сур’ёзным ударам па інфармацыйнай прасторы Фінляндыі ў той час, калі надзейныя незалежныя навіны важныя як ніколі. Нацыянальнае інфармацыйнае агенцтва — гэта інфраструктура, якая служыць грамадскім інтарэсам: калі яно закрываецца, рэгіянальныя і мясцовыя СМІ губляюць жыццёва важную крыніцу інфармацыі, а грамадзяне — доступ да дакладных звестак. Мы падтрымліваем наш фінскі філіял UJF і 95 калег, чые працоўныя месцы знаходзяцца пад пагрозай, і заклікаем фінскі ўрад выканаць абяцанне аб падтрымцы і забяспечыць STT устойлівую будучыню».

У выпадку закрыцця агенцтва STT Фінляндыя стане выключэннем сярод заходніх краін, большасць з якіх дагэтуль маюць уласныя нацыянальныя інфармацыйныя агенцтвы.