У «экстрэмісцкі» спіс Мінінфарма ўключылі два TikTok-акаўнты з рэгіянальнымі навінамі

11 сакавіка на сайце Міністэрства інфармацыі ў чарговы раз папоўнілі Рэспубліканскі спіс экстрэмісцкіх матэрыялаў.

Фота: БАЖ

У адпаведнасці з рашэннем суда Буда-Кашалёўскага раёна Гомельскай вобласці ад 10 сакавіка 2026 года ў гэты спіс трапіў Tik­Tok-акаўнт з назвай gomelnovosti33 (ідэнтыфікатар https://www.tiktok.com/@gomelnovosti33). «Цікавыя і галоўныя навіны Гомеля», — так прэзентуе сябе гэты рэсурс, які мае 32 тысячы падпісчыкаў.

Рашэннем суда Асіповіцкага раёна Магілёўскай вобласці ад 9 сакавіка 2026 года «экстрэмісцкай інфармацыйнай прадукцыяй» прызнаны Tik­Tok-акаўнт з назвай byaroza_info (ідэнтыфікатар https://www.tiktok.com/@byaroza_info ). На яго падпісаны 1724 чалавекі. Відэаролікі, размешчаныя на гэтым рэсурсе, прысвечаныя як мясцовым навінам, так і навінам з усёй Беларусі.

Апрача гэтага, суд Горацкага раёна Магілёўскай вобласці 10 сакавіка 2026 года прызнаў «экстрэмісцкім» кантэнт сацыяльных сетак вядомай міжнароднай праваабарончай арганізацыі Міжнароднае таварыства правоў чалавека (Inter­na­tionale Gesellschaft für Men­schen­rechte / Inter­na­tion­al Soci­ety for Human Rights). Гэта міжнародная няўрадавая, некамерцыйная, праваабарончая арганізацыя, якая мае статус удзельніка пры Савеце Еўропы і з’яўляецца членам Камітэта па сувязях з няўрадавымі арганізацыямі пры Савеце Еўропы.

«Экстрэмісцкай інфармацыйнай прадукцыяй» прызнаныя:

• старонка ў Face­book з назвай Inter­na­tionale Gesellschaft für Men­schen­rechte (ідэнтыфікатар facebook.com/IGFM.DE);
• старонка у Х з назвай Inter­na­tionale Gesellschaft für Men­schen­rechte (ідэнтыфікатар х.com/IGFM_DE);
• Insta­gram-акаўнт igfm.de (Inter­na­tionale Gesellschaft für Men­schen­rechte)  у (ідэнтыфікатар instagram.com/igfm.de).