«Экстрэмісцкі» спіс Мінінфарма: Telegram-канал Freedom BEL і Threads-акаўнт Thisminsk

Міністэрства інфармацыі Беларусі 13 лістапада чарговы раз папоўніла на сваім сайце Рэспубліканскі спіс экстрэмісцкіх матэрыялаў.

Выява створана БАЖ з выкарыстаннем ШІ

У ліку іншых інтэрнэт-рэсурсаў у гэты спіс уключылі старонку this­min­sk у Threads (ідэнтыфікатар https://www.threads.com/@thisminsk), якая мае больш за 13 тысяч падпісчыкаў. Рашэнне прызнаць яе «экстрэмісцкай інфармацыйнай прадукцыяй» прыняў 6 лістапада 2026 года суд Кастрычніцкага раёна Мінска.

Гэты акаўнт у сацсетцы Threads прызнаюць «экстрэмісцкай» ужо другі раз: сёлета 2 кастрычніка такое ж рашэнне прыняў суд Бабруйскага раёна і горада Бабруйска.

Старонка з’яўляецца інтэрнэт-рэсурсам беларускага незалежнага медыяпраекта This Min­sk Media, які асвятляе навіны Мінска, Беларусі і свету. Да сакавіка 2025 года ён быў шырока вядомы пад назвай «Это Минск, детка» (паводле рашэння МУС ад 4 сакавіка 2023 года быў прызнаны «экстрэмісцкім фармаваннем»). Іншыя рэсурсы медыяпраекта былі ўнесены ў «экстрэмісцкі» спіс Мінінфарма яшчэ раней.

Таксама ў Рэспубліканскі спіс экстрэмісцкіх матэрыялаў уключылі Telegram-канал Free­dom BEL (ідэнтыфікатар https://t.me/freedombelby). Суд Кастрычніцкага раёна Мінска пастанавіў лічыць яго «экстрэмісцкай інфармацыйнай прадукцыяй» 6 лістапада 2026 года.

Гэты Telegram-канал прэзентуе сябе як інтэрнэт-рэсурс, які транслюе навіны з Беларусі «без цэнзуры і прапаганды». Апошняе паведамленне на ім было апублікавана 31 кастрычніка.