У Таджыкістане адмянілі крымінальную адказнасць за лайкі ў сацсетках

Прэзідэнт Таджыкістана Эмамалі Рахмон 14 траўня падпісаў закон, які выключае з Крымінальнага кодэкса палажэнні аб пакаранні за «лайкі» і рэпосты ў сацыяльных сетках. Пра гэта паведаміла прэс-служба кіраўніка дзяржавы.

Фото: Tim Witz­dam / pexels.com

Паводле паведамлення, падпісаны закон «адмяняе крымінальную адказнасць за размяшчэнне лайка або іншага знака ў сацыяльных сетках».

Як адзначае «Радио Озоди», папраўкі тычацца двух артыкулаў крымінальнага кодэкса, якія прадугледжваюць пакаранне за публічныя заклікі да тэрарызму і апраўданне тэрарызму ў інтэрнэце. З 2018 года пад гэтыя фармулёўкі пападала нават мінімальная актыўнасць, у тым ліку лайкі і рэпосты, за якія давалі ад 10 да 15 гадоў пазбаўлення волі.

Адмену пакарання за лайкі ініцыяваў сам Рахмон. Вясной 2024 года ён раскрытыкаваў праваахоўныя органы за празмерна шырокае прымяненне гэтых норм. Ён заклікаў «пакласці канец гэтай практыцы», бо «нельга караць людзей толькі за актыўнасць у інтэрнэце».

У красавіку ніжняя палата парламента аднагалосна прагаласавала за выключэнне спрэчных палажэнняў. Пасля падпісання закона прэзідэнтам змены ўступілі ў сілу.

Па дадзеных пракуратуры Таджыкістана, у краіне больш за 1500 чалавек адбываюць пакаранне за каментары і рэакцыі ў сацсетках.