Сусветную прэмію ЮНЕСКА/Гільерма Кано атрымалі палесцінскія журналісты

Заснаваная ў 1997 годзе штогадовая  Сусветная прэмія ЮНЕСКА/Гільерма Кано за свабоду прэсы ўшаноўвае выбітны ўклад у абарону і/або прасоўванне свабоды прэсы ў любым пункце свету, асабліва калі гэта было дасягнута ва ўмовах небяспекі. Гэта адзіная падобная прэмія, якая прысуджаецца журналістам у сістэме ААН.  Яна названая ў гонар Гільерма Кано Ісазы, калумбійскага журналіста, які быў забіты перад рэдакцыяй яго газеты El Espec­ta­dor у Багаце, Калумбія. У 2022 годзе лаўрэатам гэтай прэміі быў названы БАЖ. 

— Кожны год Прэмія ЮНЕСКА/Гільерма Кано аддае даніну павагі мужнасці журналістаў, якія сутыкаюцца з цяжкімі і небяспечнымі абставінамі. У гэтым годзе Прэмія яшчэ раз нагадвае нам пра важнасць калектыўных дзеянняў, каб журналісты ва ўсім свеце маглі працягваць выконваць сваю важную працу па інфармаванні і расследаванні, —зазначыла генеральная дырэктарка ЮНЕСКА Одры Азуле.

Нагадаем, 7 кастрычніка 2023 года баевікі тэрарыстычнай арганізацыі ХАМАС з сектара Газа напалі на Ізраіль. Першы месяц вайны ў сектары Газа адзначыўся найбольшай смяротнасцю сярод журналістаў за ўсю гісторыю назіранняў, паведамляў Камітэт па абароне журналістаў. Па дадзеных Press Emblem Cam­paign (PEC)  у Ізраілі падчас нападу ХАМАС  7 кастрычніка загінулі 4 журналісты. Гісторыя аднаго з іх, фотарэпарцёра Роя Ідана, абляцела ўвесь свет. У сектары Газа на працягу кастрычніка 2023 года — студзеня 2024 года, па дадзеных таго ж PEC, прадстаўнікі медыя гінулі практычна кожны дзень.